ဇူလိုင် ၃၀ ၊ ၂၀၂၆
GG (VOM)
Eastern Naga Defence Army (ENDA) နာဂလက်နက်ကိုင်အဖွဲ့က ဖမ်းသွားတဲ့ စစ်ကိုင်းတိုင်းအထက်ပိုင်း၊ ခန္တီးမြို့နယ်၊ ချင်းတွင်းမြစ်ကမ်းဘေး၊ မှန်ပင်ရွာက ဒေသခံအယောက် ၇၀ နီးပါးရှာမတွေ့တာအပြင် သူတို့စခန်းအနီးရွာက နောက်ထပ် လူအယောက် ၅၀ လောက်ထပ်ဖမ်းပြီး တပ်စခန်းပါနေရာ ရွှေ့ပြောင်းသွားတယ်လို့ ဒေသခံတွေက ပြောပါတယ်။
မှန်ပင်ရွာက ဖမ်းဆီးခဲ့ရတဲ့ ဒေသခံတွေနဲ့ အဆက်အသွယ်ရှိဖို့အတွက် မိသားစုဝင်တွေက နာဂလက်နက်ကိုင်အဖွဲ့စခန်းရှိရာကို လိုက်သွားခဲ့ပေမယ့် တပ်ဖွဲ့တခုလုံး စခန်းနေရာရွှေ့သွားကြောင်းသိခဲ့ရတဲ့အပြင် စခန်းနဲ့ အနီးမှာရှိတဲ့ ရွှေမြင့်မို့ရ်ရွာက ဒေသခံ အယောက် ၅၀ လောက်ကိုပါ ထပ်မံဖမ်းဆီးခေါ်သွားတာကို သိခဲ့ရတာပါ။
” စခန်းရှိနိုင့်မယ့်နေရာကို သတင်းရလို့ ဒီနေ့ကျွန်မတို့လိုက်သွားကြတယ်။ ဟိုရောက်တော့ တပ်ဖွဲ့တခုလုံးပြောင်းသွားပြီသိရတယ်။ သူတို့စခန်းက ရွှေမြင့်မို့ရ်ရွာအနောက်ဘက်က တောထဲမှာ ရှိတာ ။ စခန်းမပြောင်းခင် အဲဒီရွှေမြင့်မိုရ်ရွာကနေလည်း လူ ၄၀ ကျော် ၅၀ လောက်ပါသွားတယ်သိရတယ်။ လူတွေဆွဲသွားတာက ဟိုနားတစုဒီနားတစုဆွဲသွားတာဆိုတော့ အခုမှ စာရင်းကောက်နေကြတုန်းပဲ။ ကျွန်မတို့ စဖြစ်ကတည်းက အစိုးရဘက်ကို အကူအညီတောင်းထားပါတယ် ။ ” လို့ မိသားစုဝင်တယောက်က ပြောပါတယ် ။
နာဂလက်နက်ကိုင်အဖွဲ့က တပ်စခန်းပြောင်းသွားတဲ့အတွက် ဖမ်းဆီးခံရတဲ့ ဒေသခံတွေ နဲ့ မိသားစုဝင်တွေ အဆက်အသွယ် မရတော့တာကြောင့် သက်ဆိုင်ရာ အစိုးရတာဝန်ရှိသူတွေအနေနဲ့ ကူညီပေးစေလိုကြောင်း ဒေသခံတွေက ပြောပါတယ်။
လက်ရှိမှာ အစိုးရတပ်ဘက်ကတော့ ဖမ်းဆီးခံရတဲ့ ဒေသခံတွေကို ကယ်ထုတ်နိုင်ရေးအတွက် စစ်ကြောင်းထိုး နယ်မြေရှင်းလင်းရေးလုပ်နေတယ်လို့ သိရပါတယ် ။
ဒေသခံတွေဖမ်းဆီးခံရတာကတော့ မနေ့က ဇူလိုင် ၂၉ ရက်နေ့ ညပိုင်းမှာ နာဂလက်နက်ကိုင်အဖွဲ့ဟာ မှန်ပင်ရွာထဲကို ဝင်ရောက်ပြီး ဝိုင်ဖိုင်သုံးနေတဲ့ အမျိုးသား တွေအပါအဝင် အမျိုးသမီးတွေ ၊ ရွှေမျောလုပ်ကိုင်သူတွေကို ဖမ်းဆီးသွားတာဖြစ်ပါတယ်။
” ည ၉ နာရီခွဲလောက်ဝင်ပြီး ဝိုင်ဖိုင်သုံးနေတဲ့ ကလေးတွေ မိန်းမတွေ အကုန်ခေါ်သွားတယ်။ကျွန်မတို့အိမ်ကငါးယောက်ပါတယ်။ ကျန်တဲ့အိမ်တွေလည်း ခုနှစ်ယောက်ပါတဲ့သူနဲ့ ဘာနဲ့ဆိုရင် ၇၀ နီးပါးရှိတယ်။ ပါသွားတဲ့သူစာရင်းတွေ အခုစာရင်းပြုစု ထားတာ ၆၅ ရှိတယ်။ကျန်တဲ့မိန်းကလေးတွေလိုတာ နာမည်မသိရသေးလို့ ။ ရွာထဲကသူတွေက ၃၀ ကျော်လောက်ပါမယ်။ မျောထဲက ၃၀ ကျော်လောက်ပါမယ်။ တခြားရွာက လာလုပ်တဲ့သူ တချို့တဝက်ပဲပါမယ်။ သူတို့က ရွာထဲကိုအရင်ဝင်တယ်။.ကျွန်မတို့ဆီရောက်တော့ ၉ နာရီခွဲရောက်တယ်။ ကျွန်မတို့မျောက ရွာနဲ့ တနာရီလောက်သွားရတယ်။ စစ်မေးစရာရှိတယ် နှစ်ရက်၊ နှစ်ရက်သုံးရက်လောက်နေရင် အကြောင်းပြန်ပေးမယ်ပြောတယ်။ ” လို့ လက်နက်ကိုင်အဖွဲ့ ဖမ်းဆီးခံလိုက်ရတဲ့သူတွေထဲက မိသားစုဝင်တယောက်က ပြောပါတယ် ။
အဆိုပါ နာဂလက်နက်ကိုင်အဖွဲ့ဟာ ပြီးခဲ့တဲ့ရက်ပိုင်းကပဲ ရွှေမျောလုပ်ကိုင်သူတွေဆီကနေ မျောတခုကို သိန်း ၁၀၀ ကျော်ကနေ ၂၀၀ ကျော်အထိ တောင်းခံခဲ့သလို မှန်ပင်ရွာထဲက ဝိုင်ဖိုင်စက်တွေကိုလည်း ဆတ်ကြေးကောက်ခဲ့တယ်လို့ ဒေသခံတွေပြောပြချက်အရ သိရပါတယ် ။
လက်ရှိမှာ ခန္တီးမြို့နယ်အခြေအနေက ခန္တီးမြို့ပေါ်ကို အစိုးရက ထိန်းချုပ်ထားပြီး ကျေးရွာဘက်တွေ မှာတော့ ကချင်လွတ်လပ် ရေးတပ်KIA ၊ ရှမ်းနီတပ်SNAနဲ့ NUG လက်အောက်ခံ လက်နက်ကိုင်အဖွဲ့တွေရှိသလို နာဂလက်နက်ကိုင်အဖွဲ့ တွေလည်းရှိတယ်လို့ သိရပါတယ် ။
အခုလို ဒေသခံပြည်သူ အယောက် ၇၀ နီးပါးကို ဖမ်းဆီးသွားတဲ့ကိစ္စနဲ့ပတ်သက်ပြီး နာဂလက်နက်ကိုင်အဖွဲ့ ဘက်ကတော့ စာထုတ်အသိပေးတာမျိုးမရှိသေးပါဘူး ။
နာဂလက်နက်ကိုင်အဖွဲ့ဟာ အရင်ကလည်း ဒေသခံတွေကို ဖမ်းဆီးတာမျိုးရှိခဲ့တယ်လို့ သိရပါတယ် ။
ဓာတ်ပုံ – CJ
